Сэтгүүл зүйн салбарын хөгжил дэвшлийн төлөө халуун залуу нас, эрдэм мэдлэг, авьяас чадвараа харамгүй зориулж, цуцалтгүй хөдөлмөрлөн, уйгагүй зүтгэж ирсэн үе үеийн ахмад сэтгүүлчид, хэвлэл мэдээллийн байгууллагын ахмад ажилтнууд та бүхэндээ Олон улсын ахмадын баярын өдрийн халуун мэнд дэвшүүлье.

Иргэдийн мэдээлэл олж авах эрхийг дээдлэн, шударга үнэн мэдээллийг цаг алдалгүй хүргэхийн төлөө бүтээлч хөдөлмөрөө, сэтгэл зүтгэлээ, оюун ухаанаа дайчлан ажиллаж, хийсэн бүтээсэн бүхнээ залуу хойч үеийнхэндээ өв болгон үлдээсэн ахмад сэтгүүлч, уран бүтээлчид Та бүхнээрээ бид үргэлж бахархаж, басхүү дээдлэн хүндэлж явдаг билээ.

Эдүгээ 105 жилийнхээ ойтой золгож байгаа Монголын сэтгүүл зүйн ууган байгууллага болох Сэтгүүлчдийн нэгдсэн эвлэлийн удирдлагын баг хамт олон  хэвлэл мэдээллийн байгууллагуудыг чадавхижуулах, мэргэшсэн сэтгүүлчид бэлтгэх, гадаад харилцаа хамтын ажиллагаагаа өргөжүүлэхийн зэрэгцээ сэтгүүлчдийнхээ нийгмийн асуудлыг шийдвэрлэхээр олон талт ажлуудыг зохион байгуулж байна. Монголын Сэтгүүлчдийн нэгдсэн эвлэл 21 аймгийн салбар зөвлөлөө шинэчлэн зохион байгуулж, сэтгүүлчдэд зориулсан сургалтын хөтөлбөрүүдийг санаачлан зохион байгуулахын зэрэгцээ  түүхэндээ анх удаа 16 давхар “Сэтгүүлч ордон” байгуулахаар шав тавьж, 1000 сэтгүүлчийг орон сууцанд хамруулах хөтөлбөрөө хэрэгжүүлж эхлүүлээд байна.

Хараат бус, хариуцлагатай, ёс зүйтэй мэргэжлийн сэтгүүл зүйг төлөвшүүлэх  бидний  энэ үйл хэрэгт ахмад, буурлуудын маань алтан сургааль, дэмжлэг оролцоо нэн чухал юм. Та бүхний хуримтлуулсан арвин баялаг туршлага, эрдэм мэдлэг, хойч үеэ гэсэн чин шударгуу сэтгэл тань өнөөдөр ч бидний зорин тэмүүлж буй чиг, замыг гэрэлтүүлж байна.

Азай буурлууд, ахмад сэтгүүлчид та бүхэндээ эрүүл энх урт насалж, элбэг баян, удаан жаргахыг ерөөе.

МОНГОЛЫН СЭТГҮҮЛЧДИЙН НЭГДСЭН ЭВЛЭЛИЙН ЕРӨНХИЙЛӨГЧ                 

 Х.МАНДАХБАЯР

Сүүлд нэмэгдсэн мэдээ